അദ്ദിക്ർ

35: 25 ഇതേ ആശയത്തിലുള്ള സൂക്തമാണ്. മുന്‍ പ്രവാചകന്മാരുടെ കാലഘട്ടങ്ങളിലെ കപടവിശ്വാസികളും അനുയായികളുമടങ്ങിയ കാഫിറുകളുടെ സ്വഭാവമാണ് ഇവിടെ ചിത്രീകരിക്കുന്നത്. സബൂറിന്‍റെ ബഹുവചനമാണ് സുബുര്‍ (ഏടുകള്‍) എന്ന പദം. ഈ സൂക്തത്തില്‍ പറഞ്ഞ തെളിവുകളും ഏടുകളും വെളിച്ചം നല്‍കുന്ന ഗ്രന്ഥവും കൊണ്ട് ഉദ്ദേശിക്കുന്നത് ഗ്രന്ഥത്തിന്‍റെ ഏറ്റവും നല്ല വിശദീകരണമായ അദ്ദിക്ര്‍ തന്നെയാണ്. അദ്ദിക്ര്‍ പ്രകാശമാണെന്ന് 4: 174; 5: 15; 7: 157; 64: 8; 66: 8 തുടങ്ങിയ സൂക്തങ്ങളിലെല്ലാം പറഞ്ഞിട്ടുണ്ട്. ഒറ്റ ഗ്രന്ഥം (അല്‍കിതാബ്) മാത്രമേ ഭൂമിയിലേക്ക് ഇറക്കിയിട്ടുള്ളൂ. അതിന്‍റെ ശരീരം വിവിധ ഭാഷകളിലാണെങ്കില്‍ ആത്മാവ് (ആശയം) ഒന്നുതന്നെയാണ്. നിശ്ചയം അദ്ദിക്ര്‍ പൂര്‍വ്വിക ഏടുകളില്‍ ഉണ്ട് എന്ന് 26: 196 ല്‍ പറഞ്ഞിട്ടുണ്ട്. അതുതന്നെയാണ് 313 പ്രവാചകന്മാര്‍ക്കും അവതരിപ്പിച്ചിട്ടുള്ളതെന്നും അത് അവതരിപ്പിക്കപ്പെട്ടത് അല്ലാഹുവിനെക്കൂടാതെ മറ്റൊരു ഇലാഹുമില്ല എന്നും അപ്പോള്‍ നിങ്ങള്‍ അവനെ മാത്രം സേവിക്കുക എന്നും പഠിപ്പിക്കുന്നതിനുവേണ്ടിയാണ് എന്ന് 21: 24-25 സൂക്തങ്ങളില്‍ പറഞ്ഞിട്ടുണ്ട്. 2: 2 ല്‍ വിവരിച്ച പ്രകാരം അന്ത്യപ്രവാചകനായ മുഹമ്മദിന് നല്‍കപ്പെട്ട അദ്ദിക്റില്‍ മുമ്പ് വന്നിട്ടുള്ള 312 ഗ്രന്ഥങ്ങളും അവയുടെയെല്ലാം ഏറ്റവും നല്ല വിശദീകരണങ്ങളും അടങ്ങിയിട്ടുണ്ടെന്നും അത് 312 ഗ്രന്ഥങ്ങളെയും സത്യപ്പെടുത്തുന്നതും കാത്തുസൂക്ഷിക്കുന്നതുമാണ് എന്നും 5: 48; 41: 43 സൂക്തങ്ങളില്‍ വിവരിച്ചിട്ടുണ്ട്. 

ത്രികാലജ്ഞാനിയായ നാഥന്‍റെ സംസാരമായ അദ്ദിക്റിന്‍റെ 40 പേരുകളും തള്ളിപ്പറഞ്ഞുകൊണ്ട് അല്ലാഹുവിന്‍റെ കാര്യത്തില്‍ തര്‍ക്കിച്ചുകൊണ്ടിരിക്കുന്ന ഫുജ്ജാറുകളും അവരുടെ ജിന്നുകൂട്ടുകാരും 6: 115-116 സൂക്തങ്ങളില്‍ വിവരിച്ച പ്രകാരം നരകക്കുണ്ഠത്തില്‍ കുത്തിനിറക്കപ്പെടാനുള്ളവരാണ്. 2: 185, 285; 3: 60-61 വിശദീകരണം നോക്കുക.